أراجوز. بقلم الشاعر. د. شريف شحاته
زجل
أراجوز
بقلم شريف شحاته
مصر 30 يونيو 2024
أراجوز مسكين حيران فنان بدم خفيف وبألف لسان بيضحك ناس وبيسعد ناس ويحب يغني مع الغلبان بيثور ويدوس علي أوجاعهم ويقول أفكار
ويدوس علي جرح بيوجعهم مع عيشة مرار
الناس بتجيله من الحارة بتسهر علشانه
وبصوت مسموع مع زمارة علي طرف لسانه
فتوة وسامع بحكايته قام فجأة وثار
وعلي ايدي راح تبقي نهايته وبعتله حمار
أول ما الأراجوز ييجي يغني التاني ينهق
ويقوله الناس تسمع فني يصرخ ويزعق
وبيرفس الكشك برفسة تجعله يهتز
وبيعطس علي وشه العطسة علي طول بيفز
الأراجوز قام عامل خطة وبإيده وكفه
قام حاطط فلفل علي شطة وراح دسه في علفه
أول ما البغل بدأ أكله راح لف ودار
بقي يصرخ من الشطة بتاكله وبيولع نار
الناس بتطبل وتزفه علي حس نهيقه
والبغل بيضرب علي كفه من زهقه وضيقه
وبقي يهرب من وسط الناس وبيجري بذنبه
أنا مالي بأراجوز حساس الناس بتحبه
وعاد الأراجوز تاني يغني ويطبل ليهم
مرة يصحصحهم مستني بيفوق فيهم
شريف شحاته
تعليقات
إرسال تعليق