مفتاح قلبي. بقلم الشاعر. أ. عبد الحميد وهبه
(مفتاح قلبى )
مفتاح قلبى أنا سيبته معاك
وأنت حبيبى مشيت وقفلته
معقول خايف إنى أنساك ...؟
ده أنا بإيديا ليك سلمته
خليه معاك دايماً وأطمن
ده مافيش غيرك فيه راح يسكن
حبك جوه القلب إستوطِن
وقت ما ليك بخاطرى فتحته
مفتاح قلبى أنا سيبته معاك
وأنت حبيبى مشيت وقفلته
مفتاح قلبى خلاص بقى ملكك
وأنت لوحدك فيه متحكم
عمرى ماسيبته لحد أنا قبلك
خفت لأسيبه وأرجع أندم
فات العمر ومش بالساهل
أنى آلاقى اللى بيستاهل
وإنى آأمنه أكيد على قلبى
ويبقى الود ما بينا واصل
مفتاح قلبى اللى إديتهولك
إوعى فى مرة تفرط فيه
كل كلام حلو حاكيتهولك
جوه القلب حبيبى داريه
علشان وقت ما أكون أنا واحشك
تسمعه ليل ونهار مع نبضك
وقت ماتبقى حبيبى فى وحدة
دايماً هتحس أن أنا جانبك
خليه معاك دايماً وإطمن
ده مافيش غيرك فيه راح يسكن
حبك جوه القلب إستوطِن
وقت ما ليك بخاطرى فتحته
مفتاح قلبى أنا سيبته معاك
وأنت حبيبى مشيت وقفلته
بقلمي عبدالحميد وهبه
تعليقات
إرسال تعليق