بحر الكِبر. بقلم الشاعر. أ. عبد الحميد وهبه
( بحر الكِبر )
إوعى بحر الكِبر ياخدك
أو تروح شط الغرور
فجأة هتكون فيه لوحدك
وتلاقيه بركان يثور
وإوعى تسكن قصر عالى
فُوق وحاسب م التعالى
التواضع أصله غالى
وسلعة مش ممكن تبور
إوعى بحر الكِبر ياخدك
أو تروح شط الغرور
إوعى مرة تقول لنفسك
إن أنا بابا المجال
لما قالها حد قبلك
حاله أصبح يعنى حال
إوعى ترضى بظلم غيرك
إوعى تلغى فى يوم ضميرك
لو عملت ده كله فعلاً
الندم هيكون مصيرك
إوعى تسكن قصر عالى
فوق وحاسب م التعالى
التواضع أصله غالى
وسلعة مش ممكن تبور
إوعى بحر الكِبر ياخدك
أو تروح شط الغرور
بقلمي عبدالحميد وهبه
تعليقات
إرسال تعليق