مسحراتي. بقلم الشاعر. وائل البطراوي
مسحراتى مسحراتى
30 يوم موجود ليلاتى
ب همة و بشكله الجديد
والفكر مش فكر عادى
مسحراتى فاهم وداير
جاى يصحى فينا الضماير
لأجل ما ننول البشاير
لابد من ضمير سليم
رمضان كريم
مسحراتى معاه ورقة مكتوبة
بينصح نعدل الذمم المقلوبة
ونلحقها بإستغفار وتوبة
قبل ما نقابل جبار عليم
رمضان كريم
مسحراتى رافض الكره والضغينة
وحركات الأندال ولاد الاذينة
إللى الكلمة منهم تعكر مدينة
وتشعلل فيها الجحيم
رمضان كريم
مسحراتى صعبان عليه الغلابة
شايف حالهم وسط الديابة
معاه طبلة ومعاه ربابة
وبيحكى عن الحال الأليم
رمضان كريم
مسحراتى ماشى تاتا تاتا
مأكد وحالف يمين تلاتة
قبل ما تنولوا السعادة
لازم يرجع حق المظاليم
رمضان كريم
كل عام وحضراتكم طيبين
وائل البطراوى
تعليقات
إرسال تعليق