بلبل أفندي. بقلم الشاعر. د. شريف شحاته
زجل
بلبل أفندي
بقلم شريف شحاته
خف علينا ياسي بلبل أفندي نفسي أرتاح بالليل وأنام قلنا أهي أزمة مسيرها تعدي أو مرحلة وتمر أوام صوتك جاب لي في راسي صداع ولما سألت قالوا مهرجانات حتي الحلم أهو عدي وضاع وزمن الفن مر وفات خف يا عم البلبل هدي خف علينا يا سي بلبل أفندي
ليل ونهار شغال بتنهق زيطة كبيرة مع حبة وش وسامع برضه الناس بتزعق مرة في زفة أو شيل عفش واقف وسط الحفلة بكرشك عامل فيها مطرب حساس ينعل مالك وكمان قرشك دة انت فاضحنا في وسط الناس آه لو سمعك أبويا وجدي خف علينا يا سي بلبل أفندي
إللي أنا سمعه دة مش مزيكا دي إسمها دوشة أشبه بالزار ما فيهاش ولا نهاوند وسيكا حتي الصوت أقرب لحمار وشايف ناس عمالة بتنقط وترمي فلوس علي بطن سعادتك وشحط بيرقص وواحدة تزيط وناس فرحانة بفن سيادتك ودمعي بيدعي الليلة تعدي خف علينا يا سي بلبل أفندي
تعليقات
إرسال تعليق