بنقدم روحنا فدا ليكم. بقلم الأديب. د. شريف شحاته
زجل
بقلم شريف شحاته
السلام عليكم
مصر ٢٧ يوليو ٢٠٢٤
السلام عليكم معاليكم بنقدم روحنا فدا ليكم
ونضحي برقبتنا علشانكم وايه تسوي الدنيا غير بيكم
بنموت من الغم علشان تسعد وأحلامنا تكتبها إيديكم
ونطاطي الرقبة وبنركع لكي تعلا وترفع أساميكم
ونبطل ناكل أو نشرب وبنشبع من قول يرضيكم
ونبيع الأرض والدار والأرض في الأصل أراضيكم
وبنزعل لو نسمة تعدي من غير ما تمر تعديكم
بنخاف عليكم من الهمسة أو كلمة عابرة تأذيكم
لو مرة حسينا بخطورة برقبتنا بنجري ونفديكم
ونداري دموعنا بكفوفنا لو دمعة حتأثر فيكم
بنغني عرايا بلا شكوي لجل ما نستر بلاويكم
تخاريفكم بنفكر فيها بنشوفها أسمي معانيكم
مستقبل اولادنا معاكم تكفينا الدعوة وتكفيكم
وسلاحنا معاكم يحمينا بيصون اعراضنا ويحميكم
الفقر نعمة بنعيشها ونشوفها رخاءا في عينيكم
والنعمة لو كانت منكم تغور من وشي وتعطيكم
شريف شحاته
تعليقات
إرسال تعليق