كتير يا قلبي. بقلم الأديب. د. شريف شحاته
زجل
بقلم شريف شحاته
كتير يا قلبي
مصر 24 مايو 2024
دة كتير يا قلبي دة كتير عليا أكتم وأخبي الجرح فيا
أول ما شفته كان مرة صدفة شغلي بالي بنظرة عينيه
سحرني قوله وبكلمة تحفة خلي روحي لعبة في إيديه
فضلت أحبه وما أشوفش غيره كأني عايش معاه أسير
أشوف عذابه وما أشوفش خيره عايش معايا من غير ضمير
ودة يرضي مين في الدنيا ديا الضحك ليك والدمع ليا
دة كتير يا قلبي دة كتير عليا أكتم وأخبي الجرح فيا
يا ما كنت أشوفه فرحان سعيد يضحك لغيري وكأنه خله
وكنت أراقبه كدة من بعيد ألاقيه بيرقص مرتاح في ضله
ولو لمحني بيفوت أمامي ماسك في إيده وقلبه معاه
أسهر ليلتها قلقان منامي سهران أفكر ولا أشوف سواه
ودة يرضي مين يجري اللي بيا أشيل في نفسي كل الأسية
دة كتير يا قلبي دة كتير عليا أكتم وأخبي الجرح فيا
فكرت أجرب مرة ألومه وأقوله ليه تشغلني بيك
القلب داب وكترت همومه أول ما شاف نظرة عينيك
وأقول في نفسي مهما تعاتبه عمره ما حيسأل ويحس تاني
القسوة طبعه وساكنة في قلبه نصيبي أعشق مغرور أناني
ودة يرضي مين دمعة عينيا عايش بجرحي والعشق غيا
دة كتير يا قلبي دة كتير عليا أكتم وأخبي الجرح فيا
تعليقات
إرسال تعليق