ضحكة تايهة. بقلم الشاعر. د. يحيى المنياوي
( ضحكة تايهة )
بقلمي م / يحيى المنياوي
..............................
ولسة بندور
في صندوق الزمان
على ضحكة تايهة
يا ولاد الحلال
ضحكة مرسومة على الوش
من غير غش..
فيها خفة.. وفيها دلال
تصحي القلب لو كان نعسان
تفتح من الخير ببان
يرقص القلب.. يدندن يغني
على صوت خلخال
ما حدش شاف ضحكة تايهة
يا ولاد الحلال
فتشنا في كل الوشوش..
من غير رتوش
ولا ألوان تزغلل عنينا
ضحكة كانت هنا معانا
عايشة ما بينا
مولودة جوانا
الصبح يصبح مسانا..
والشمس جاية من بعيد
تحضن سنين هوانا
يفرح حاضرنا وي ماضينا
يا ضحكة مرسومة
على جبين محبينا
الحب يرسم خطوط خطاوينا
يهل الليل الجميل.. ومعاه النجوم
يضحك القمر..
يقول أنا مش معزوم
يطول السهر.. ومهما يطول
القلب يغني يقول موال
ماحدش شاف ضحكة تايهة
يا ولاد الحلال
ضحكة كانت تبكي العينين
رامية بالرمش
تكتب دواوين
حسة بالهمس..
تعزف على الوتر وترين
يا حكاية عشق لبكرة وأمس
أه لوترجع ضحكة زمان
الأيد في الأيد
شبكنا ايدينا
على فين رايحين
في زمان غير الزمان
مكان فيه الأمان
فيه دفى وحنين
لو ماتت الروح
وسابت الأيدين المتشبكين
لسة الضحكة بتبوح
ضحكة في كلمة في حدوتة
حب.. وفرح.. ودلال
ماحدش شاف ضحكة تايهة
يا ولاد الحلال.................
تعليقات
إرسال تعليق