بلاش تخبّي// الكاتب✍أ.عبد الحميد وهبة

(بلاش تخبّي )

وحياة الفار اللي فى عِبي

لتقول وبلاش يعني تخبّي

أنا حآسّة إن إنت بتكدب

وبتلعب بيّا يا روح قلبي

وحياة الشك اللي ماليكي

ما فيه مرة أنا كِدبت عليكي

مش عارف ليه بس ده كله

طب أعمل إيه لجل أرضيكي

أنا عيني ما بتبطّل رّف

والعقل أهو طار مني وخف

أنا حاسة إن أكيد فيه غيري

مش واحدة ده أكيد فيه ألف

ليه يعني شَيفاني كازانوفا

والخلق عليا ملهوفة

أنا عايش واضح طول عمري

وحقيقتي آهي باينة ومعروفة

جايز دي صورة وحقيقية

لكن مش واضحة أكيد ليّا

الكل شايفها وعارفها

لكن شيفاها أنا مش هيّ

بصراحة أنا أحترت معاكي

ما فيه حاجه جايّة على هواكي

طول عمري بحاول أرضيكي

ولا يوم فكّرت أتحدّاكي

مش قادرة أكدِِّب إحساسي

والشك اللي هياكل راسي

لو عايز تثبت إخلاصك

ف الصِدق أكيد شرط أساسي

طب قولي إزاي عايزة أثبتلِك

ونجوم الليل أنا عدّيتلِك

وبحور البعد اللي ما بينّا

عدّيتهم عوم يعني وجيتلِك

الكاتب✍

أ.عبدالحميد وهبه

20/1/2024