حوار بين حرف (س) و حرف (ش) // الكاتب✍د.علي مسلم عجمي
حوار بين حرف (س) و حرف (ش) ..
----------------------------------------------
ما بين سين و شين سجلنا حوار
و كِل حرف قدّم للمعاني إعتبار
و ما بين أخذ و رد في لمحاورة
للنتيجة ما قدرت آخذ قرار.
س ..سمرا بسماري الشعر يا شين ارتجل
كرامة سماري بالفصيح و من زجل
يا شين شمسك من عدا سين السما
ما بتطلع و بيصيبهــا سهم الأجــــل
ش ..شراعي بحرف الشين بيمشي اليخوت
شامة عخد الشُقر و بنـات البيـــوت
الشين شبكة السين سمكة بقلبها
خليك عالق بالشبك حتى تمــوت
س ..السين خلّا شمسك شعاعا سطـع
الأذن لولا السين ما جـاهـا سمع
سلاحي و حرف السين ربحوا المعركة
استسلم عدوّي و سقط عالربك ركع
ش ..السهرة بلا شُهرة و شموع مشكشكي
سُفرة سفرجل عالسطيحة مسبـّكـي
بالشين شاعر بالشهامة و الشعور
مش سين سـم و سهـم بيسبب بِكِي
س .. سلاحي سهم فَتَّاك عرقاب العِدا
و سيفي بيوم المعركة سم الردى
السين سِحِر عيون سمرا فاتني
و عالياسمينة سارحة عطور و ندا
ش .. شو هالحكي يا سين سهم الصابني
بالشين شلتو و عند سينك سابني
عالسم زيدي 3 نقط.. شم الورود
شعور شافي و بالشدايد هابني
س .. سِكِّة سَفَر سُكّر أطايبها و درر
ساعة سواعدها مكاسب للبشر
ما شلحتها الشين سمعة حالها
و بالسين سلتها ملاني بالثمر
ش .. شلال مي بمنظرو الشادي شدا
شهد حتّى شوق للشاهد بدا
شط أما سد محتاجة البشر
بسهرة يا سين شعاعها طول المدى
س .. سِلِم و سلام السين سادات البشر
و 3 نقــط عالسر بالشـر انتشر
بالسين فيك تقولها عـامك سعيد
مباركة عليكي السنة يا سين الدرر
ش ..شين الشرايــع شرّعــت شاشاتها
شهدت لهـا الساحـات عشهـاداتها
شَعر الصبية الليل لونو مـاخـذو
و اسْوَد لمـا استـأسدوا ساداتها
س ..سلسال ساعتها سلالة سامقـة
سواعِد سليمة ساعدتهـا ساحقة
سِحرها سَلَّـط سلاطينو سْهام
ساحـاتهـا سبقِـت سواعد سابقة
ش ..شاف شقرا شمال شباكي شاويش
شرعتلو شفافها شقت شاليش
شالها شفاف شرنقتو شعاع
شكلو شكل شلال شمعاتو شواكيش
سين شين نجـوم متـل الفرقدين
شوفة سعادة بشوف فيها العينتين
كل حرف عنـدو إختصـاصـو بالكلام
و مستحيل التفرقة بين التـنـيـن
الكاتب✍
الشاعر …
د. علي مسلم عجمي
لبنان
27/11/2023
تعليقات
إرسال تعليق