آخر رسمة // الكاتب✍الكاتب✍أ.حمدي البوقي
أخر رسمة
________
قول ع الدنيا السلام
شايفين ف سمانا حمام
بيرمح رمح
خايفين منك ياحمام
لتكون ف لحظة صاروخ
خايفين؟
أه خايفين مش من الموت لا
خايفين ازاي م حيبقوش
إنزل ياحمام
نوح وغنى عدودة وموال
وغطي الشهدا الأطفال
ولملم باقي الكراريس
إنزل ياحمام لم لكوام
صحن المدرسة
بقى كتلة نار
عد الشهدا وعد الكم
كراريسهم شاربة دم
وهناك الواد
إللى م كمل حرف الكلمة
والتاني كمل باقي الكلمة بدمه
وعيل اخر كلمة قالها حاموت
شايف ياحمام...
شكل الموت
جديد ع الدنيا..
شكل الموت
ياحمام
قول للأطفال الباقية
تنقش بالدم حبة جوابات
كل سطورها من دم اخواتها
إللى مابقوش أطفال
ياااااأطفال
إبعتوا لضمير الدنيا النايم
قولوا للحكام
يختشوا ع الدم
قولوا مين ح يشم
ريحة كراسة الواجب
أخر واجب
كان موضوعة
(احب اكون)
رسول سلام
أخر رسمة كانت
غصن الزيتون
الناقد
الكاتب✍
أ.حمدي البوقي
27/11/2023
تعليقات
إرسال تعليق