بلاش تتعلق ع الآخر. بقلم الشاعر. أ. علي نافع عبد الغني
بلاش تتعلق ع الآخر..
الشاعر / علي نافع عبد الغني
...
على قد ما قلبك يتعلق...
على قد ما بعدين تتألم...
الدنيا دي طبعها بتفرّق...
و طبيعي بنرضى و بنسلم...
نكتم في قلوبنا و بنداري...
و هناخد ايه لو نتكلم...
فبلاش تتعلق ع الآخر...
علشان بعدين تقدر تنسى...
الدنيا دي فيها حاجات قاسية...
و لكنّ البعد اكيد أقسى...
لو كان فيه حد قريب منك...
و ما كانش ما بينكم اى حدود...
لو واحد كان كل حياتك...
و في لحظة خلاص ما بقاش موجود...
راح تعمل ايه بعد فراقهُ...
من بعد ما راح و لا يوم هايعود...
....
و انا كانلي حبيب بالنسبالي...
بوجوده انا كنت انسى مشاكلي...
في غيابه بكون دايماً مهموم...
في وجوده الدنيا بتضحكلي..
لو يوم يتألم بتألم...
بتغير و يبان على شكلي...
كان كل منايا يكون راضي...
و لا يزعل ابداً يوم مني...
كان بس وجوده في حياتي...
مديني امان و مطمني...
كانت اكتر حاجة بخاف منها...
لو يجي اليوم يبعد عني...
واهو جاني اليوم اللي بقيت فيه...
اتمنى يعود لو لثواني...
اتمنى و لو اسمع صوته...
يناديني بأسمي من تاني...
من غيره مش عارف اكمل...
من بعده بآسى و بعاني...
فراقه ده جرح كبير هايعيش...
جوايا مأثر و معلم...
على قد ما قلبك يتعلق...
على قد ما بعدين تتألم...
تعليقات
إرسال تعليق