زجل، معلم، بقلم الشاعر. د. شريف شحاته
زجل
معلم
قاعد فوق الكرسي معلم صاحب المقهى يا عم فانوس
الناس تمشي وتيجي وتسلم وانت كلامك بقي بدروس
لابس عمة وشال علي الرقبة وراسم حاجبك حد الموس
قصدي لو تتواضع حبة ربك قادر يكفي نفوس
ترفع سعر الشاي والقهوة ويوم عن يوم عمال بتدوس
حتي الشاي مغشوش وبرغوة وطعم البن مش محسوس
لو فيه زبونة لطيفة جميلة تشرب ولا تدفعشي فلوس
تسعد بيها وتغمز ليها وتحلم بالأحضان والبوس
وكل القهوة بتخدم فيها وانت كمان فرحان مجعوص
وأما تشوفني تلوي في بوزك كأنك شايف وشي كابوس
إيه الفرق ما بيني وبينها هي الموزة وأنا فاقوس
انت تحاسب عل مشاريبها وأنا مشروبي يزيد بفلوس
وأما أدعيلك ربي يعزك تلوي رقبتك يا خلبوص
مرة أقولك أحاسب بكرة تسب وتشتم تقول متعوس
أرد في سري وأقول علي فكرة إنت الواطي يا فحل جاموس
بكرة الدنيا تدور علي حالك وتصبح يومها فقير منحوس
وزي ما تذل كرامتي بمالك بكرة يقولوا عليك موكوس
شريف شحاته مصر
تعليقات
إرسال تعليق