من حقي أثور. بقلم الشاعر. د. سامي محفوظ حنا
من حقي أثور
كلمات سامي محفوظ حنا
أنا إنسان عادي
لا متكبر ولا مغرور
طبعي كتير هادي
ولحظات أغضب
فيها وأثور
لما الباطل يصبح حق
ويتحامى في بلطجي
مأجور
لما أتنازل عن حقي
وأنا مجبور
وأنا بتهان علشان
رغيف العيش
في زحمة الطابور
من حقي أثور
لما يضيع عمري
في التعليم
وواحد تاني
ياخد مكاني
علشان أبوه
راجل ميسور
من حقي أثور
أنا أب زي كل الأبهات
اكتر كلمة بسمعها هات
مطلوب ألبي الإحتياجات
ما أقدرش أقول ما فيش
ما أقدرش أقول معذور
ما أقدرش أكون
قدام ولادي أب مكسور
من حقي أثور
وأعبر عن مشاعري
أدافع عن كرامتي
أطالب بحقي
في خير بلدي
ليه يروح للغريب
ويتحرم على ولدي
عيشونا في ضلمة
قطعوا النور
الفقر افترسنا
الظلم دهسنا
بقينا شعب مقهور
من حقي أثور
كلمات سامي محفوظ حنا
تعليقات
إرسال تعليق