أخد القرار // الكاتب✍أ.عبد الحميد وهبة

( أخَد القرار )

م الواضح إنُه خلاص كده أخد القرار

وماسبلِناش قُدامنا ولا أي إختيار

أنا كنت فاكرة بإن ده كلام وعادي

طِلع كلامُه حقيقي فعلاً مش هزار

طَب كان سأل أو حتى يستَنى شوية

علشان أشوفُه وأمَلّي من صورتُه عينيا

من وقت لمّا راح وسابني وغاب عليا

وأنا حاسّة طول الوقت دايماً بإنكسار

غاب عني فجأة وسابني ليه وسط الضياع

وأنا زي مركب وسط ريح مالهاش شراع

كان سابلي ذكرى حتى لو كلمة وداع

تشغلني يعني في بُعدُه وقت الإنتظار

م الواضح إنه خلاص كده أخد القرار

قرارُه كان واللهِ يعني صعب جداً

بين يوم وليلة إزاي كِده قرّر وأعلَن

مش عارف إني في بُعده راح أتعب وأحزن

وتملّي طول الوقت يتملّكني خوف

حاولت يعني كِتير أقولُّه بجد أصبُر

وعِيد حِسابك تاني على مهلَك وفكّر

مش جايز أنا وإنت مع بعضينا نِقدر

نِتحدّى أي صعب أو أصعب ظروف

الكاتب✍

أ. عبدالحميد وهبه

27/11/2023