خليها على الله.. بقلم الشاعرة. د. زكيه فيصل
خليها على الله
خليها علي الله ومتخافش من بكرة
دا الرزاق هو الله ارمي تكالك عليه
لو ليك نصيب في حاجه هتنولها علي فكرة
ليك رب رزاق وكريم يبقي هتزعل ليه
مهما الحال يضيق ولا الأسعار تزيد
ربك بيرزق في كل حال ومفيش عنده محال
مهما كان اللي انت عايزه قريب أو بعيد
ربك قادر يسخر لك طلبك وتنوله كده في الحال
قادر يجبر بخاطرك وتكون فرحان سعيد
متشلش هم بكرة سيب بكرة علي الكريم
عمره ماقصر معاك ولا يوم سابك ونساك
دا انت بتقول يارب تلقي رب رحيم
جبرك سترك وساندك جمبك دايما معاك
متخفش من اللي جاي خد من اللي فات اماره
وافتكر لما كانت تضيق وفجأه تفرج
برحمه ربنا بيك مش بالمجهود والشطارة
خلي عندك يقين مهما بتضيق هتفرج
رزق الله ملوش شروط ولا رحمته محدوده
قادر يرزقك مهما الدنيا ترخص ولا تغلي
دايما خيره عليك ونعمه حاضرة وموجوده
بكرة الهموم تزول بمشيئته بكره احلي
زكيه فيصل
تعليقات
إرسال تعليق