إيه يا عبد الرحمن. بقلم الشاعر. د. محمد مرزوق
إيه يا عبد الرحمن
ليه منزلتش مصر
بقالك عشر سنين وفوق كمان
عاجبك العيشه في بلاد الغربه
في بلاد التركمان
مزهقتش من الوحده ومن الغربه
ومن سيبان الأهل والخلان
مش عايز تاخد نصيبك من الفقر
ومن الحرمان
طيب أسأل حتى بجواب
أو بكلمه كيفكم يا أحباب
من ساعه ما أمك ما ماتت
يمكن نسيت العنوان
نقول إيه..
يعدلها الرحمن
يا عبد الرحمن
اللي لا يغفل ولا ينام
يا ترى انت سامعني
دلوقتي
يا عبد الرحمن
سامع ابوك
ولا حاطط في ودانك طين
ولا انطرشت بقالك زمان
كل اللي كنت عايزه منك
مش فلوس ولا أطيان
كنت عايز اطمن عليك
قبل ما أموت
وياكلني دود الأرض
مفيش حاجه هتدوم
يا عبد الرحمن
والكل تحت التراب هينام
يا عبد الرحمن
محمد مرزوق /أداء وكلمات
مونتاج/ منه الله محمد
تعليقات
إرسال تعليق