الندل قال للجدع.. بقلم الشاعر.. أ. وائل البطراوي
الندل قال للجدع
سبحان مُغير الأحوال
فاكر أيام الصِبا
كان حالنا نفس الحال
انا إللى حالى ارتقا
وانت إللى بختك مال
عايش حياة الشقا
من غير طموح وأمال
ركزت في التعليم
بشهادة مالها مجال
إنك تكون زينا
ده حلم أصله محال
معانا الفلوس للرُكب
محتاجة ١٠٠ شيال
المهم فى الفهلوة
وإزاى تجيب المال
ضحكله ضحكة رضا
وبص في عيونه وقال
مال الحيرة فيهم كدا
شكل الكلام مُحتال
كل كلامك فضا
كإنه نسج خيال
السعادة إيمان بالقضا
وهدوء وراحة بال
وأهم حاجة فى المسألة
يكون الرزق حلال
وائل البطراوي---------------------
تعليقات
إرسال تعليق