يمكن خير، بقلم الشاعر. أ. علي نافع عبد الغني

يمكن خير... 

... 

شايفك زعلان... 

و تقول انا حظى بجد قَليِل... 

شايل فوق قلبك و محمل... 

لا إصحى يا عم كدة و كمل... 

ماتسيبش القلب حزين و عليل... 

ايه يعني باعوك و خانوك و سابوك... 

او حتى بقسوتهم جرحوك... 

ماهو يمكن لو فضلوا شوية... 

في حياتك كان ممكن ودوك... 

لطريق كان صعب تكمل فيه... 

إحمد ربنا لهُ حكمة في ده... 

فأوعاك من زعلك تسأل ليه... 

ماهو يمكن خير... 

.... 

أوقات بنحب كتير أشياء... 

و بتطلع شر و تتعبنا... 

و بنكره أشياء في حياتنا... 

و بتسعد عمرنا و قلوبنا... 

فالناس اللي سابوك إتطمن... 

دول ناس مش شبهك و لا توبك... 

الشخص اللي يحبك و بجد... 

من قبل ما هايحب ميزاتك... 

تلاقيه بيحبك بعيوبك... 

تلاقيه وياك مش بيسيبك... 

مش يبقى معاك وقت الفرحة... 

و وقت الصعب و لا داريبك... 

إحمد ربنا انه بيكشف... 

قدامك بدري في حقيقتهم... 

فا بدل ما هاتندم ان سابوك... 

إندم على إنك حبيتهم... 

مش كل الخير بيكون في عطاء... 

أوقات الخير بيكون حرمان... 

لو ربك حرمك من حاجة... 

إعرف و إتأكد لو جاتلك... 

هاتعيش بسببها تعيس حيران... 

سيبها على الله هو العالم... 

فين راحتك و يوديك ليها... 

فالناس اللى سابوك إنساهم... 

ماكانوش خير ليك... 

فأضحك للدنيا و عديها..

........ 

علي نافع عبد الغني